Праваслаўны турнір “Што? Дзе? Калі?” прайшоў у Маларыце

На базе Маларыцкай раённай гімназіі прайшоў адборачны тур інтэлектуальнай гульні “Што? Дзе? Калі?” Маларыцкага благачыння. Ён быў прымеркаваны да 220-годдзя з дня нараджэння і 150-годдзя з дня смерці мітрапаліта Літоўскага і Віленскага  Іосіфа (Сямашка).

З уступным словам да  ўдзель­нікаў спаборніцтва, частка якіх наведвае нядзельную школу,  звяр­нуўся протаіерэй Віктар Паляціла,  благачынны цэркваў Маларыцкай акругі, кандыдат багаслоўскіх навук. Ён засяродзіў увагу прысутных на розных аспектах царкоўна-грамадскай дзейнасці мітрапаліта Іосіфа, а таксама пажадаў ім правільных адказаў і перамогі.

Адборачны тур праходзіў у выглядзе каманднай гульні. Конкурсная праграма складалася з 20 пытанняў (двух тураў), на абмеркаванне кожнага з якіх адводзілася адна хвіліна. Камандам-удзель­ніцам  былі прапанаваны пытанні, якія тычыліся шматграннай дзей­насці мітрапаліта Іосіфа,  яго асобы,  жыцця.

Інтэлектуальнае спаборніцтва прайшло займальна і цікава. Па выніках адборачнай гульні больш за ўсё балаў набрала каманда “Добрыя сэрцайкі” з СШ №2 райцэнтра (трэнер Тамара Тарноўская). На другім месцы аказаліся юныя знаўцы з “Чырвонага сокала” і “Джэнтльмены ўда­чы”, якія прадстаўлялі раённую гімназію (трэнер Леанід Лук’янчук). Трэцюю прыступку заняла каманда “Ніка” з раённай гімназіі.

Каманды-пераможцы спабор­ніцтва атрымалі падарункі ад протаіерэя Віктара Паляцілы. А “Добрыя сэрцайкі” 6 лістапада прымуць удзел у Афанасьеўскім інтэлектуальным турніры сярод навучэнцаў нядзельных школ Брэсцкай епархіі.

Дзякуючы падрыхтоўцы і ўдзелу ў інтэлектуальнай гульні вучні яшчэ больш даведаліся аб гісторыі Беларусі і пазнаёміліся з жыццём аднаго з выдатных царкоўных дзеячаў мінулага.

Мікалай НАВУМЧЫК.

Поделиться:
  •  
  •  
  •  
  •  
  •  
  •  

Добавить комментарий